Конфессияаралық келісім – ел дамуы кепілдіктерінің бірі
Қазақстан – көпұлтты, көптілді және көпконфессиялы мемлекет. Ел халқының діни сенім-нанымдары әртүрлі болғанымен, барша азаматтар бейбітшілік пен келісімде өмір сүріп келеді. Бұл – Қазақстандағы ішкі тұрақтылықтың басты шарттарының бірі. Дәл осы конфессияаралық келісім мемлекетіміздің дамуында маңызды рөл атқарады және оның тұрақты дамуының кепілдігі болып саналады.
Қазақстанда ислам, православие, католицизм, протестантизм, иудаизм және буддизм сияқты дін өкілдері қатар өмір сүреді. Елімізде 18-ден астам діни конфессияны ұстанатын 3 800-ден астам діни бірлестік бар. Осындай әртүрлілік мемлекеттің рухани байлығы ретінде қарастырылады. Бұл – төзімділік пен өзара сыйластықтың жарқын үлгісі.
Кез келген елдің гүлденуі мен экономикалық дамуы ішкі тұрақтылыққа тікелей байланысты. Егер қоғамда діни алауыздық орын алса, ол елдің болашағына қауіп төндіреді. Ал Қазақстанда діни сенім бостандығы заңмен қорғалған және барлық конфессиялар арасындағы татулық мемлекеттік деңгейде қолдау табуда. Президент жанындағы Діни істер жөніндегі агенттік, Қазақстан халқы Ассамблеясы және Әлемдік және дәстүрлі діндер лидерлерінің съезі – осы бағыттағы нақты іс-шаралар мен механизмдердің бір бөлігі ғана.
Бүгінгі жастар – болашақтың негізі. Сондықтан жас ұрпақты толеранттылыққа, өзге діндерге құрметпен қарауға тәрбиелеу – маңызды міндеттердің бірі. Мектептер мен жоғары оқу орындарында діни сауаттылықты арттыру, радикалды идеологияның алдын алу жұмыстары да осы бағытта жүргізіледі.
Қазақ халқы ежелден «Қонаққа Құдайындай құрмет көрсет» деген қағиданы ұстанып келген. Бұл – тек ұлттық дәстүр емес, конфессияаралық келісімнің де негізі. Елдің тыныштығы мен дамуы – баршамыздың ортақ мүддеміз. Сондықтан әр азаматтың діни төзімділік пен келісімді сақтауға үлес қосуы – ел болашағы үшін маңызды. Конфессияаралық келісімді сақтау – тек бейбітшіліктің емес, сонымен қатар өркендеудің де кепілі.
Б.Шеркешбаев
«Ақпараттық-талдау орталығының» бөлім басшысы
Автор публикации
