Қоғам кеселімен күресу тәсілі
Бүгінде елдің алдында тұрған ең өзекті мәселелердің бірі – сыбайлас жемқорлықпен күрес. Бұл құбылыс мемлекеттің әлеуметтік-экономикалық дамуына ғана емес, қоғамның рухани-адамгершілік негіздеріне де айтарлықтай нұқсан келтіруде. Мемлекеттік қызметші ретінде осы мәселенің қоғамға тигізетін кері әсерін терең түсініп, оның алдын алу жолдарын қарастыру – баршаның ортақ міндеті.
Тәуелсіздік алғалы Қазақстан бұл күресте айтарлықтай жетістіктерге қол жеткізді. 1998 жылы республика «Сыбайлас жемқорлыққа қарсы күрес туралы» Заң қабылданып, кейіннен бірқатар маңызды құқықтық актілер өмірге келді. Мемлекет басшысы Қасым-Жомарт Тоқаевтың бастамасымен қабылданған Қазақстан Республикасының сыбайлас жемқорлыққа қарсы саясатының 2022-2026 жылдарға арналған тұжырымдамасы елдің осы бағыттағы саясатының тұғырнамалық құжатына айналды.
Дін істері басқармасының басшысы ретінде атап өткім келетіні, сыбайлас жемқорлықпен күрес – тек заңнамалық шаралармен шектелмейтін, терең рухани-адамгершілік мәні бар күрес. Ислам дінінде де, басқа да әлемдік діндерде парақорлық пен жемқорлық ауыр күнә ретінде қарастырылады. Құран Кәрімде: «Бір-біріңнің мал-мүліктеріңді заңсыз жолмен жемеңдер» деген аят бар. Пайғамбарымыз Мұхаммед (с.ғ.с.) пара берген де, пара алған да жамандық екендігін айтқан.
Қазақстан Республикасының «Мемлекеттік қызмет туралы» Заңына сәйкес әрбір мемлекеттік қызметші өз қызметін атқару барысында заңдылық, әділдік, ашықтық және кәсібилік қағидаттарын басшылыққа алуға міндетті. Атырау облыстық Дін істері басқармасы да өз қызметінде мемлекеттік органдардың ашықтығы мен қоғам алдындағы есептілігін қамтамасыз етуге ерекше мән береді.
Сыбайлас жемқорлықтың алдын алу үшін біз бірқатар жүйелі шараларды жүзеге асырып келеміз. Атап айтқанда, мемлекеттік қызметшілердің кірістері мен шығыстарына мониторинг жүргізу, қызметкерлердің біліктілігін арттыру, этикалық нормаларды сақтау, азаматтардың өтініштерін уақытында қарау сияқты маңызды жұмыстар атқарылып жатыр.
Діни бірлестіктермен жұмыс барысында да ашықтық пен заңдылық қағидаттары қатаң сақталады. Діни ұйымдарды тіркеу, олардың қызметін реттеу мәселелерінде заң талаптарын мүлтіксіз орындау – басты назарда. Сонымен қатар, діни қызметкерлермен бірлесіп, жастар арасында адамгершілік құндылықтарды насихаттау, сыбайлас жемқорлыққа қарсы мәдениетті қалыптастыру бағытында да ауқымды жұмыстар жүруде.
Қазір сыбайлас жемқорлықпен күрес жаңа деңгейге көтерілді. Цифрлық технологиялардың дамуы мемлекеттік қызметтердің ашықтығын арттырып, бюрократиялық кедергілерді азайтуға мүмкіндік береді. «Электрондық үкімет» порталы арқылы көптеген қызметтер онлайн режимде көрсетіліп жүр, бұл сыбайлас жемқорлық тәуекелдерін айтарлықтай төмендетті.
Алайда, бұл бағытта тек техникалық шешімдер мен заңнамалық шаралар жеткіліксіз. Сыбайлас жемқорлықпен күрес әрбір азаматтың өзінен басталуы тиіс. Біз жастарды отансүйгіштікке, адалдық пен әділдікке тәрбиелеуіміз қажет. Бұл ретте діни құндылықтары мен ұлттық дәстүрлердің ролі зор.
Діни сенім – адамның рухани тазалығы мен адамгершілік қасиеттерінің қайнар көзі. Сондықтан, біз діни ұйымдармен бірлесіп, қоғамда жемқорлыққа қарсы иммунитетті қалыптастыру бағытында жұмыс істеп келеміз. Мешіттер мен діни оқу орындарында арнайы дәрістер өткізіліп, уағыздар айтылып жүр.
Мемлекет басшысы Қасым-Жомарт Кемелұлы атап өткендей, сыбайлас жемқорлықпен күрес жалпыұлттық іске айналуы керек. Бұл – әрбір мемлекеттік қызметшінің, әрбір азаматтың жауапкершілігі. Біз тек бірлесе отырып қана осы қоғамдық дертпен күресе аламыз.
Сыбайлас жемқорлық – тек заң бұзушылық емес, адамның жан дүниесінің азғындауының көрінісі. Біздің ата-бабамыз «Адал бол – абыройың асады, арам бол – абыройың қашады» деп бекер айтпаған. Жемқорлық жолына түскен адам қоғам алдында ғана емес, әуелі өз ар-ожданы алдында күнәһар болады. Ұрпаққа қалдыратын мұра, келер ұрпаққа көрсетер өнеге – әркімнің өз таңдауы.
Бүгінгі таңда әрбір отбасы, ата-ана және азамат өз перзенті мен айналасына адалдықтың үлгісін көрсетуі тиіс. Өйткені, жемқорлықпен күрес – тек заң күшімен шешілетін мәселе емес, рухани тазару мен адамгершілік қасиеттерді қайта жаңғырту жолы. Абай атамыз айтпақшы, «Адамның адамшылығы істі бастағандығынан білінеді, қалайша бітіргендігінен емес».
Сондықтан, бүгіннен бастап әрқайсымыз өз ісімізді адал атқарып, келешек ұрпаққа таза қоғам сыйлау жолында аянбай еңбек еткен жөн. Сонда ғана біз ата-бабамыз аманат еткен қасиетті жерде әділ де таза қоғам орната аламыз.
Қаһарман МҰСАЕВ,
облыстық дін істері басқармасының басшысы
Автор публикации
