Конфессияаралық келісім – ел дамуының кепілі
XXI ғасыр – жаһандану мен ақпараттық технологиялардың қарыштап дамыған, әлем елдері өзара тығыз байланыс орнатқан кезең. Осындай күрделі де қарқынды заманда мемлекеттердің тұрақты дамуы мен өркендеуі үшін ішкі тұрақтылық пен қоғамдық келісім ерекше маңызға ие. Бұл тұрақтылықтың негізгі факторларының бірі – конфессияаралық келісім.
Қазақстан – тарихы мен мәдениеті терең, көпұлтты әрі көпконфессиялы мемлекет. Әр алуан дін өкілдерінің өзара сыйластықпен өмір сүріп жатқан елімізде конфессияаралық келісім тек ішкі тұрақтылықтың емес, ел дамуының да басты кепіліне айналып отыр.
Конфессияаралық келісім дегеніміз – түрлі діни сенімдегі адамдардың бір мемлекет ішінде өзара түсіністік пен құрметке негізделген өмір сүруі. Бұл келісімнің арқасында діни алауыздық пен қақтығыстардың алдын алуға, біртұтас қоғам қалыптастыруға мүмкіндік туады. Қазақстан Республикасының Конституциясында әр азаматтың ар-ождан бостандығы мен діни сеніміне еркіндік берілген. Бұл – дін өкілдері арасындағы татулықты сақтау жолындағы құқықтық негіз. Елімізде ешбір діннің басымдығы мойындалмайды, бұл да теңдік пен әділеттілікті қамтамасыз ететін маңызды фактор.
Тәуелсіздік алғаннан кейін Қазақстанның алдында ел ішіндегі ұлттық және діни топтар арасындағы қарым-қатынасты үйлестіру міндеті тұрды. Мемлекет бұл бағытта ерекше жол таңдап, толеранттылық пен өзара құрметке негізделген саясат жүргізіп келеді. Бүгінгі таңда елімізде 130-дан астам ұлт пен 18-ден астам конфессия өкілдері бір шаңырақ астында өмір сүріп жатыр. Қазақстанның конфессияаралық келісімді нығайтудағы халықаралық деңгейдегі бастамаларының бірі – Әлемдік және дәстүрлі діндер лидерлерінің съезі. Бұл форум алғаш рет 2003 жылы өткізілген және содан бері әр үш жыл сайын тұрақты түрде өткізіліп келеді. Форум аясында түрлі дін өкілдері бір үстел басына жиналып, бейбітшілік пен келісім мәселелерін талқылайды. Бұл – Қазақстанның тек ішкі емес, жаһандық деңгейдегі діни татулықты сақтауға үлес қосып отырғанының айғағы.
Кез келген елдің өркендеуі үшін ең алдымен ішкі тұрақтылық қажет. Бұл тұрақтылықтың негізінде – қоғам мүшелерінің өзара түсіністігі, діни және этностық ерекшеліктерге деген құрмет жатыр. Егер мемлекет ішінде алауыздық, қақтығыс немесе дін атын жамылған радикализм белең алса, ол қоғамның тыныштығын ғана емес, экономикалық, саяси және мәдени дамуын да тежейді. Қазақстанда конфессияаралық келісім сақталғандықтан, ел ішінде ірі қақтығыстар мен діни араздықтар орын алған жоқ. Бұл – халықтың бірлігі мен биліктің сындарлы саясатының нәтижесі. Қазақстан халқы Ассамблеясы мен Дін істері комитеті, аймақтардағы Діни бірлестіктермен байланыс кеңестері осы бағытта тұрақты жұмыс істеп келеді.
Еліміздегі конфессияаралық келісімді нығайтуда жастардың рөлі ерекше. Себебі қазіргі жас – ертеңгі қоғамның негізін құрайтын буын. Сондықтан жастар арасында діни сауаттылықты арттыру, түрлі сенімдерге құрметпен қарауды үйрету – өзекті мәселе.
Білім беру саласында толеранттылыққа баулу, зайырлылық принциптерін дұрыс түсіндіру – конфессияаралық келісімді сақтаудың тиімді жолдары болып табылады. Сонымен қатар жастардың теріс діни ағымдарға ілесуінің алдын алу бағытында мемлекеттің ақпараттық-түсіндіру топтары белсенді жұмыс жүргізіп келеді. Қазақстанның мәдени көптүрлілігі – рухани байлығымыз. Әр ұлт пен ұлыс, әр дін өкілі өз дәстүрі мен сенімін сақтай отырып, ортақ қазақстандық қоғамдастықты қалыптастырып отыр. Бұл бірлік біздің елді өзгелерден ерекшелейтін артықшылығымыз деуге толық негіз бар.
Әр ұлт пен дінге деген сыйластық, ортақ құндылықтарға негізделген өмір сүру – қоғамның рухани-адамгершілік іргетасын қалыптастырады. Сондықтан Қазақстан халқының мәдени және діни әртүрлілігін сақтау – мемлекет үшін стратегиялық маңызды міндеттердің бірі.
Қорыта айтқанда, конфессияаралық келісім – ел дамуының, қоғамдық тұрақтылықтың, бейбіт өмірдің және болашаққа сенімді қадам басудың негізі. Қазақстан бұл бағытта өзіндік жолын қалыптастырған, діни татулықты сақтаудың үлгісін көрсете білген ел.
Әрбір азамат – қай дінді ұстанбасын – ортақ Отанымыздың тыныштығы мен бірлігіне өз үлесін қосуы тиіс. Өйткені бейбітшілік пен келісім – тек үкіметтің емес, бүкіл халықтың қолындағы аманат. Осы аманатты сақтай білсек, Қазақстанның болашағы бұдан да жарқын болары сөзсіз.
Айдын Серікбаев
Анашым мешітінің имамы
Автор публикации
